ഇനിയും ജന്മങ്ങളുണ്ടാകും, അതിലിനിയും സ്വപ്നങ്ങളുണ്ടാകും!
വസന്തഗ്രീഷ്മഹേമന്തവർഷങ്ങൾ തുന്നിയോരുറുമാലിൽ-
വീണ്ടും ജീവിതനൂലിഴകൾ ഇണ ചേരും;
അവിടെയും കണ്ണീരിന് മധുരമുണ്ടാകില്ല!!
തേടുന്നു ജന്മാന്തരങ്ങൾ, ജന്മാന്തരങ്ങളെ പ്രണയിക്കാനാകില്ല!
കാലമൊരുക്കുന്നാ യവനികയ്ക്കുള്ളിൽ, എന്നോ മറഞ്ഞ-
കിനാക്കളും, എന്നിൽ നിറഞ്ഞ വ്രണങ്ങളും തിരികെയെത്തും;
അവിടെയും വേദന പുളകിതനാക്കില്ല!!
മൃത്യുവിൻ കുളിരിലുറഞ്ഞൊരാ ദു:ഖങ്ങൾ വീണ്ടും വിരുന്നെത്തും!
നോവിന്റെ തേങ്ങലിൽ, നെഞ്ചിന്റെ വിങ്ങലിൽ-
തല ചായ്ക്കാനൊരുചുമലവിടെയും വേണം;
അവിടെയും നിരാശ ഉന്മത്തനാക്കില്ല!!
കൊതിക്കാനൊന്നുമില്ല കാരണങ്ങൾ, ഇനിയുമൊരു ജന്മം;
അനുഭവം സാക്ഷിയാണതിനൊക്കെയും!!
പക്ഷേ വേണമെനിക്കിനിയൊരു ജന്മം, അവിടെങ്കിലും-
അവളുണ്ടാകുമെൻ ചാരത്തെന്ന പ്രതീക്ഷയിൽ!!
